ضاع مني خمسين تصميم
وصورة حبيبتي
شغل سنة وشوية .. مئئان عينين
ووجع قلبي معاها .. وكلها
مشاوير
كل ما افتح الـ
(D)
يقولي أفرمتهولك
أقوله يا عم بلاش
NO
قعد حمادة على الجهاز
يلعب سوليتير
ولما قله أفرمتهولك
قاله يا ريت
YES
حدفت حمادة م الشباك
وشتمت سوليتير
*****
فكيت
الهارد من مساميره
ورحت لسعيد
قالي معلش يا صاحبي
ملكش
نصيب
قلت له : هو انت عرفت إن انا
حبيت؟
وان صورتها راحت ف الفورمات
ولا بتتكلم ع التصاميم
قالي الاتنين
وقعد يضحك زي البني آدمين
أصل هو حيوان وابن ..
******
مشيت
و شتمت حمادة ... وسعيد
وشتمت سوليتير
******
ركبت الميكروباظ
لئيتو بيغني
قارئة الفنجان
مسدود .. مسدود .. مسدود
:وطي لو سمحت
ما وطاش
:وطي يا عم
مابيردش
:وطي يا أسطى
راح معلي ع الآخر
وبصلي ف المراية
:على جنب لو سمحت
******
قلت اقلب ف الهارد
يمكن الاقي صورتها في اي مكان
*.jpg
مفيش
*.gif
مفيش
طب لما أجرب
*. bmp
آآه
يا قلبي ..
.......
ملكش
نصيب ..
صورتها راحت .. طب ما هي اصلا
راحت
طلعت مخبوطة
ومن زمان قبل التطعيم
التصاميم راحت ..طب وإيه يعني
هو أصلا في شغل
ولو حتى ببلاش
والجهاز بينو هنج
وعقلي كمان
...
وسمعيني أحلى
restart
****** |
